ANDAI ANDAI JEME BESEMAH PAGAR ALAM "TIVI TEKE RIMUT"

CERITE SANDI TANAH BESEMAH

TIPI TEKE RIMUT

karya : RD Kedum

Pagiantu pasar Simpang Empat katah raminye. Jeme, mubel, mutor, bicak singgenye saincet. Maklumlah amu ndak riaye jeme sandi dusun, talang, kebun, ke pasar gale. Jeme bejualani singgenye lok ghuleh mainan saje. katah anjame. Tuape banyak untong, terutame tukang barot ngah ruti-ruti ndek isi gelok.

“Ayo ibong, mamak, barot alap! Murah! Cucuok ngah selire jeme kite!!! Tebal, alap, murahpule!” Kate jeme Padang bejualan di pingger jalan. Camughak barotetu. Ade ndek kuneng, abang, ijang, itam.

Maklum jeme kiteni, jarang ke pasar. Ke pasar sesekalitu, mburong. Singgenye tuape dijual jeme dibeli gale. Ape agi rege kawe dang naek pule. Prinsip’e umpung duit ade, kawe berege, kebile agi..melandekahnya. Beli sugus, mbeli ayek urson, makan misoh, kerupok, ngah es. Ew, dide ndak masok ke warung ige, pingger jalantulah. Bekecikes.

Nah, ceritenyeni Udin makitulah pule. Dieni mpai udem jual kawe. Dek diket, empat ton!! Maklum dang mutegh agung.

Dalam pikiran Udini, nak lebarani jeme pasti rami di ghumahe. Mangke lemak reramian ndak mbeli tipi. Anye nak masok ke tukoh tipitu, akuni perlu besepatu. Mangke Cinetu dide ujokan naekah rege sekendak’e. Kele kicekahnya akuni jeme sandi duson. Pikir Udin.

Dekade..mpok kukot lok bagong (itam, kasar, kapalan), petame ndek dibelinyeni sepatu. Dipilehlah sepatu itam mengkilat. Lah ngengikak saja dieni bejalan ngijekah sepatu mpai tu. Takut benagh kalu teghijak ngah jeme banyak. Kata ghapate dieni minggir li ndak ngelap sepatu alapetu, bebarot kecek segitan kain bininye, dilepate luk sapu tangan.

Sambel nyimpol peloh, akhire Udini sampai ke rare’an tukoh tip, radioh, tipi, ngah pita. Langsung diancap’e ngah anak buah di tokohtu.

“Tuape di cakagh Mak (mamak=mamang). Pecak’e ndak mburong kamuni Mang eh..lain nian amu jeme beduetni” Kate anak buah Cinetu ngujok. Ape agi nginak Udin kincah’e luk tairan, ngijekah sepatu.

Sambel nggihem, Udin ni cecingal dek langsung nimbal. Dagunyeni naek diket, mangke kin’an lok jeme agong.

“Hei! Akuni ndak cakagh tipi…mirek ndek alap, besak pule”
“Oii…au Mang, sini Mang…masok. Nah..ini ade ndek besak libagh, ndek ini adenge agi, nah ndek ini adenge agi..tekecek. Mirek’e macam-macam Mang..nah..ini pulitrun, ndek ini sap, ndek ini panasunek, il ji, ..tinggal pilih”

“He’eh…mirek ndek paleng alap, ndek paleng mpai, ndek mane?” Kate Udin lok jeme calak benagh. Padahal sijad uruf die dek tau mbacenye.

“Ini Mak…mpai datang tini kemaghi..” Kate anak buah cinetu nunjuk mirek sap, besak, libagh, datagh luk kace.
“Nah, kite idupkah kudai….”
Jreng..jreng…ljreng….idup.
“Cacam!! Kah besak’e” Udin tekanjat, tepundor. Ase kah ditegok tipi.
“Way…Way…way…kah besak pule tini…antahku dek jauh ngah dindeng gumah kami tini. Cacaaaaam….aseku pacak luk di biskop amu nunton di ghumah” Dalam hati Udin, mate tebelet.

“Nah..Mak…amu ndak segah nginak gambar’e, kamutu mbeli ndek besak nilah. Kinak’ilah nah jemenye..luk bukan gambar. Kamu tinggal dudok. Picet-picet sandi jauh..muncol gambare”
“Auuu….’”Kate Udinni luk kah tekatew. Dalam ati dieni bepikir”Antahku..melungok gale jeme seduson nginak tipi besak”
“Beghape deng rege tipi ndek ini..” kate Udin lah dek sabar. Ase ndak diangkute makinilah.
“Murah Mak, gi 29 juta..” Kate anak buah Cinetu semangat.
“Dek tahu kurang? Jadilah pule selawi juta” Kate Udin. Awak dalam hati empok 39 juta maseh kah dibelinye. Mangke pacak ngampok ngah jeme di dusonne.
“Oii jadi Mang, ambeklah..pelaresan. Murah tini Mak..…teke rimut” Kate anak buah cine tu.

“He’’? Tekerimut?” Udin pagean.
“Au Mang..tekerimut gale tipi kami ni”
“Ndek dide tekerimut ade?” Kate Udin agi.
“Oii..dide bediye. Tekerimut gale..tipi kite. Ndek itu jaman dulu Mak…”
“Aii…amu luk itu ude, aku urung mbelinye. Aku ndak cakagh ndek alap”
“Lah mang alap tini. Alap, besak, datagh…”
“Mane pule kapoh tekerimut”

“Adak auu Mak, teke rimut gale tipi makini…”
“Nah ape kateku. Dek kah dege benagh kapoh. Duetku abes, tipi tekerimut” Udin langsong keluagh sandi tukoh Chinetu sambel bengangam.
“Manciane aku bange..tingak..majoh taiiii…kapoh nak dijuali tipi tekerimut. Kusembeleh nian kele Chinetu. Dengkek ni. Kate Udin ngengincat ngijekah sepatu alap